काठमाडौँ । मुलुक सङ्घीय संरचनामा गएपछिको संघीय संसदको तल्लो सदनको पहिलो कार्यकाल सकिएको छ । संघीयताको अवधारणा अनुरूप भएको निर्वाचनपछि गठित प्रतिनिधि सभाको कार्यकाल शनिबार मध्यरातिदेखि समाप्त भएको हो । यससँगै एकैसाथ निर्वाचन भएका सातवटै प्रदेशका प्रदेश सभाको कार्यकाल पनि शनिबार रातिदेखि नै सकिएको छ ।
निर्वाचन आयोगले आजबाट चुनावी गतिविधि थालेको छ । मंसिर ४ मा हुने निर्वाचनको समानुपातिकतर्फको बन्दसूची पेस गर्ने दिन आज भएकाले यसभन्दा अघिल्लो दिनलाई आधार मानेर संघीय एवं प्रदेश संसदको कार्यकाल समाप्त गरिएको हो । संविधान र कानुनी रूपमा कार्यकालको सुरुवात र अन्त्यबारे स्पष्ट व्यवस्था नभएपछि २०७४ सालको अभ्यासका आधारमा कार्यकाल अन्त्य गरिएको जनाइएको छ ।
संसदको चालू अधिवेशन शनिबार राति १२ बजेबाट समाप्त हुने व्यहोराको राष्ट्रपति विद्यादेवी भण्डारीले संसद सचिवालयलाइ पत्र पठाएकी थिइन् । सो पत्र पनि हिजोको प्रतिनिधि सभामा सुनाइएको थियो । संसदको कार्यकाल सकिएसँगै प्रतिनिधि सभा र प्रदेश सभाका सांसदहरू समेत स्वतः पदमुक्त भएका छन् । तर संघीय संसदको माथिल्लो सदन राष्ट्रिय सभा भने स्थायी भएकाले कार्यकाल समाप्त हुँदैन ।
अघिल्लो आम निर्वाचन २०७४ मङ्सिरमै भएको थियो । तर संसदको कार्यकाल भने सोही वर्षको फागुन २१ गतेदेखि मात्र ढिला गरेर सुरु भएको थियो । यस हिसाबले संसदले पूरा कार्यकाल काम गर्न भने पाएन । बीचमा पूर्व प्रधानमन्त्री केपी शर्मा ओलीले २ पटक प्रतिनिधिसभा विघटन समेत गरेका थिए ।
शनिबार संसद अधिवेशन अन्त्यका अवसरमा प्रधानमन्त्री, विपक्षी दलका नेता तथा अन्य दलका शीर्ष नेताहरूले सम्बोधनसमेत गरेका थिए ।