काठमाडौं। काठमाडौं उपत्यकाका तीन जिल्लाका प्रमुख जिल्ला अधिकारीको बैठक सम्पन्न भएको छ । प्रमुख जिल्ला अधिकारीहरुको बैठकले जारी निषेधाज्ञालाई थप खुकुलो पार्दै भदौ मसान्तसम्म निषेधाज्ञा थप गरेको छ । उपत्यकामा वैशाख १६ देखि अर्थात ४ महिनादेखि जारी निषेधाज्ञा हटाइएको हो ।
वैठकले यसअघि प्रतिबन्ध गरिएको सामूहिक खेलहरु, रोधीघरहरु ,सिनेमा हलहरु सामूहिक भेलाहरु स्वास्थ्य मापदण्ड पालना गरेर सञ्चालन गर्न दिने निर्णय गरेको जिल्ला प्रशासन कार्यालय काठमाडौंका प्रमुख जिल्ला अधिकारी कालीप्रसाद पराजुलीले बताउनुभएको छ । विद्यालयहरु भने स्थानीय तहहरुले जिल्ला कोभिड व्यवस्थापन समितिको समन्वयमा भौतिक रुपमा सञ्चालन गर्न सकिने उहाँको भनाइ छ ।
बालबालिकाहरुले अझै पनि खोप प्राप्त नगरेको अवस्थामा भौतिक रुपमा विद्यालय सञ्चालनमा आफूहरुले जोड नदिएको पराजुलीले बताउनुभयो । बैकल्पिक तरीकाबाट शिक्षण सिकाइ क्रियाकलाप सञ्चालन गर्न नसक्ने अवस्था भएमात्र भौतिक रुपमा विद्यालयहरु सञ्चालन गर्न उहाँको आग्रह छ ।
जारी निषेधाज्ञाको अवधिमै कोरोना सङ्क्रमणको जोखिम बढेको खण्डमा अहिले सञ्चालनमा आएका कतिपय पक्षबीचमा रोक लगाउन सकिने उहाँको भनाइ छ ।